北日本出沒注意 (一) 函館, 西波止場

患了一年「憂閉香港恐懼症」既玲子，終於等到粒粒可以請大假；係期待粒粒放大假前，玲子已配好幾度藥方，分別係預計6月頭出發既「11天蘇格蘭+西西里之旅」可惜粒粒到5月尾都未confirm度假期，唯有立刻改藥方為7月出發既「13天蘇格蘭+普羅旺斯之旅」，一個充滿期待既薫衣草旅程，可惜係當粒粒知道放大假時只有3日時間，根本就換唔切機票，隨即就攞咗玲子一向旁身既「台灣墾丁+蘭嶼7天遊」

不過粒粒玲子太耐無出國，好想飛遠點，係2012年6月13日晚既國泰網頁，試哂可以換倒機票既國家，最後結果就只有日本北海道，遲啲出發都無位，所以即晚confirm後就用3日時間plan一個從來無plan過既北海道，不過慶幸既係粒粒玲子於十年前既冬天已拜會過北海道，所以好多名勝可以skip，只去一啲特別感興趣既地方

6月17日早上好早出發到北海道札幌新千歲機場，落機後第一件事就係去攞車，上次去東京試過係呢間 http://www.toyota.co.jp/rent/ 租車 (係日本比較難搵可以儲里數既租車公司，就算有~價錢都比其他公司貴)，不過呢個網站英文部份只係比人睇資料，真係係網上book車時只show日文，粒粒就係睇下車既型號同價錢ok咁租咗架車

toyota既counter係國內線既大堂，落機後跟住下圖既國內線方向搵就會到，到counter後姐姐會比個牌你，解釋比你聽，要先係度等車，一陣有車時姐姐會叫你上車，之後大約10分鐘後會到toyota租車店，到時等職員叫你個號碼牌就可以了~

 

今次租咗架Porte，由6月17日3pm租到6月23日既2pm，共6日，總共43,706円/HK$4,252，6日全程約行咗2,000km，油錢大約HK$1,700。日本既導航系統GPS最好係入景點既電話，試過入Post Code，但個系統search唔倒

一切攪掂哂就出發去函館山，到函館行高速公路IC要比4,800円，剛剛落機接受唔倒咁大開支既路費，最後用咗3個鐘頭落到去函館，到函館山時已經8:30pm，原來函館山夜晚係唔比車上，只有日間時間先可以揸車上，好在2年前粒粒玲子睇過呢個世界3大夜景之一既函館夜景，所以決定第二朝睇日頭景喇

先介紹一下今晚既住宿，係https://www.japanican.com訂咗海鷗海濱飯店，同JR函館站距離步行20分鐘，一入大堂就有wifi，啱哂宅男粒粒，海景雙人房+免費上網+免費泊車+包埋早餐，盛為8,200円 

 

食完日式早餐終於到粒粒玲子第一個景點 ~ 函館山 ~

乘搭ROPEWAY上函館山來回每位1,160円

函館山上面有間小型店舖，貨品價錢同一般觀光店差不多，喜歡都可以買一點手信啊

呢架就係陪粒粒玲子玩足6日既Porte

西波止場

地址：北海道函館市末広町14−17

電話：0138-26-6161

http://www.hakodate-factory.com/wharf/

西波止場位於函館海旁，有餐廳、禮品店、海鮮市場等等，果日去到見倒啲著哂校服既日本小朋友，幾盒幾盒咁買好多手信，相信西波止場係函館都幾出名啊~

呢把貓貓傘原本無花紋，但一遇水就會有貓貓圖案出現

新鮮鮮甜既北日本午餐

難得陽光普照既北日本函館

(二) 小樽運河, 小樽 WING BAY OUTLET